Home ನಂಬಿಕೆ ಸುತ್ತಮುತ್ತ ಜ್ಞಾನಾರ್ಜನೆಗೆ ಆಶ್ರಯಿಸಬೇಕಾದ 24 ಗುರುಗಳಲ್ಲಿ 13ನೇ ಗುರು: ಜೇನುಹುಳ

ಜ್ಞಾನಾರ್ಜನೆಗೆ ಆಶ್ರಯಿಸಬೇಕಾದ 24 ಗುರುಗಳಲ್ಲಿ 13ನೇ ಗುರು: ಜೇನುಹುಳ

615
0
SHARE

ಶ್ರೀಮದ್ಭಾಗವತದ ಏಕಾದಶಸ್ಕಂಧದ ಎಂಟನೆಯ ಅಧ್ಯಾಯದಲ್ಲಿ ಸಂನ್ಯಾಸಿಯು ಜೇನುಹುಳದ ಬದುಕನ್ನು ಆದರ್ಶವಾಗಿಟ್ಟುಕೊಂಡು ಬಾಳಬೇಕು ಎಂದು ಹೇಳಲಾಗಿದೆ.

ಸಾಯಂತನಂ ಶ್ವಸ್ತನಂ ವಾ ನ ಸಂಗೃಹ್ಣೀತ ಭಿಕ್ಷಿತಮ್ |
ಪಾಣಿಪಾತ್ರೋದರಾಮತ್ರೋ ಮಕ್ಷಿಕೇವ ನ ಸಂಗ್ರಹೀ ||೧೧||
ಸಾಯಂತನಂ ಶ್ವಸ್ತನಂ ವಾ ನ ಸಂಗೃಹ್ಣೀತ ಭಿಕ್ಷಿತಮ್ |
ಮಕ್ಷಿಕಾ ಇವ ಸಂಗೃಹ್ಣನ್ ಸಹ ತೇನ ವಿನಶ್ಯತಿ ||೧೨||

ಈ ಎರಡು ನುಡಿಗಳ ಅರ್ಥ, ಸಂನ್ಯಾಸಿಯಾದವನು ಭಿಕ್ಷೆಯನ್ನು ಸಂಜೆಗಾಗಲೀ ನಾಳೆಗೆಂದಾಗಲೀ ಉಳಿಸಿಕೊಳ್ಳಬಾರದು. ಭಿಕ್ಷೆಯ ಪಾತ್ರೆಯ ಸ್ಥಾನದಲ್ಲಿ ಕೇವಲ ಕೈ ಮತ್ತು ಇಡುವುದಕ್ಕಾಗಿ ಹೊಟ್ಟೆಯೇ ಇರಬೇಕು. ಏಕೆಂದರೆ, ಜೇನುಹುಳವು ಜೇನನ್ನು ಸಂಗ್ರಹಿಸಿದರೆ ಜೇನಿನ ಜೊತೆಗೆ ಅದರ ಜೀವನವು ಆಪತ್ತಿಗೆ ಗುರಿಯಾಗುವುದನ್ನು ಕೇಳಿರುತ್ತೇವೆ, ನೋಡಿರುತ್ತೇವೆ. ಇದನ್ನು ಅರಿತುಕೊಂಡು ಸಂನ್ಯಾಸಿಯು ಯಾವುದೇ ರೀತಿಯ ಸಂಗ್ರಹ ಮಾಡಬಾರದು ಎಂಬುದಾಗಿದೆ.

ಇಲ್ಲಿ ಜೀವನದ ಸರಳಮಾರ್ಗವನ್ನು ಸರಳ ದೃಷ್ಟಾಂತದ ಮೂಲಕ ಹೇಳಲಾಗಿದೆ. ರೂಢಿಯಲ್ಲಿ ಒಂದು ಮಾತಿದೆ, ಅತಿಯಾದರೆ ಅಮೃತವೂ ವಿಷ ಎಂಬುದು. ಅಂದರೆ ಯಾವುದೂ ನಮ್ಮ ಅಗತ್ಯಕ್ಕಿಂತ ಹೆಚ್ಚು ಸಂಗ್ರಹವೂ ಆಗಬಾರದು, ಅದನ್ನು ಸ್ವೀಕರಿಸಲೂ ಬಾರದು. ಸಂನ್ಯಾಸಜೀವನಕ್ಕೆ ಶ್ರೀಮದ್ಭಾಗವತ ಹೇಳಿದ ಜೇನುಹುಳದ ಪಾಠವು ಸಾಮಾನ್ಯ ಜೀವನಕ್ಕೂ ಮಾರ್ಗದರ್ಶಕವೇ ಆಗಿದೆ. ಪ್ರಸ್ತುತ ಕಾಲಮಾನದಲ್ಲಂತೂ ಇಂತಹ ಅರಿವು ಪ್ರತಿಯೊಬ್ಬನಲ್ಲೂ ಇರಬೇಕು ಮತ್ತು ಪಾಲಿಸಲ್ಪಡಬೇಕು. ಯಾಕೆಂದರೆ ಸಂಪತ್ತಿನ ಸಂಗ್ರಹ ಎಂಬುದೇ ಎಲ್ಲಾ ತಾರತಮ್ಯಗಳಿಗೆ, ಆರ್ಥಿಕಸಮಸ್ಯೆಗಳಿಗೆ ಕಾರಣವಾಗಿದೆ. ಉಣ್ಣುವ ಅನ್ನವನ್ನೂ ಸಂಗ್ರಹಿಸಬಾರದು ಎಂಬುದನ್ನು ಇಲ್ಲಿ ಸೂಚಿಸಲಾಗಿದೆ. ಅಂತೆಯೇ ಧನ-ಕನಕಾದಿ ಸಂಪತ್ತುಗಳನ್ನು ನಾವು ಸಂಗ್ರಹಿಸುತ್ತಾ ಹೋದಾಗ ಆ ಸಂಪತ್ತಿನಿಂದಲೇ ನಮ್ಮ ಆಪತ್ತು ಒದಗಿಬರುತ್ತದೆ. ಸಂಪತ್ತಿನ ಸಂಗ್ರಹ ಎಂಬುದು ಒಂದು ಬಗೆಯ ವ್ಯಾಮೋಹವೇ. ಈ ಸಂಪತ್ತಿನ ಹಿಂದೆ ಬಿದ್ದವನು ಎಂದಿಗೂ ಸಂಯಮಿಯಾಗಿರಲು ಸಾಧ್ಯವಿಲ್ಲ. ಅರಿಷಡ್ವರ್ಗಗಳು ಸುಲಭವಾಗಿ ಅವನನ್ನು ಆಕ್ರಮಿಸಿಕೊಳ್ಳುತ್ತದೆ. ಹಾಗಾಗಿ ನ್ಯಾಯಯುತವಾದ ಜೀವನ ನಡೆಸಲಾಗದೆ ಮುಕ್ತಿಯ ಮಾರ್ಗವನ್ನು ತಲುಪುವಲ್ಲಿ ಸೋಲುತ್ತಾನೆ.

ಸಂಪತ್ತಿನ ಸಂಗ್ರಹದಿಂದ ಒಬ್ಬನು ಶ್ರೀಮಂತನಾಗುತ್ತ ಹೋಗುತ್ತಾನೆ, ಅದೇ ಸಮಯದಲ್ಲಿ ಇನ್ನೊಬ್ಬ ಬಡವನಾಗುತ್ತ ಹೋಗುತ್ತಾನೆ. ಒಬ್ಬನಿಗೆ ಮೃಷ್ಟಾನ್ನವಾದರೆ ಇನ್ನೊಬ್ಬನಿಗೆ ತುತ್ತುಕೂಳೂ ಸಿಗದಂತಹ ಪರಿಸ್ಥಿತಿ ನಿರ್ಮಾಣವಾಗುತ್ತದೆ. ಈ ಪರಿಸ್ಥಿತಿ ಕಲಿಯುಗದಲ್ಲಿ ಎಲ್ಲಾ ಕಡೆಯೂ ಇರುವುದನ್ನು ನಾವು ಗಮನಿಸಿರುತ್ತೇವೆ. ಅಗತ್ಯಕ್ಕಿಂತ ಹೆಚ್ಚಿನ ಊಟವು ಆರೋಗ್ಯಕ್ಕೂ ಹಾನಿಕಾರಕ ಎಂಬುದು ಎಲ್ಲರಿಗೂ ಗೊತ್ತು. ಅಂತೆಯೇ ಅಗತ್ಯಕ್ಕಿಂತ ಹೆಚ್ಚಿನ ಸಂಪತ್ತಿನ ಸಂಗ್ರಹವೂ ಅಪಾಯಕಾರಿಯೇ. ಅಲೌಕಿಕವಾಗಿ ಮನಸ್ಸು ಚಂಚಲವಾಗಲು ಇದು ಪೂರಕವಾಗಿ ನಿಧಾನವಾಗಿ ನಮ್ಮನ್ನು ಸನ್ಮಾರ್ಗದಿಂದ ದುರ್ಮಾರ್ಗದತ್ತ ಒಯ್ದು, ಅಂಧಕಾರದಲ್ಲಿಯೇ ಬದುಕಿ ವಿನಾಶಕ್ಕೆ ತುತ್ತಾಗುವಂತೆ ಮಾಡುತ್ತದೆ. ಜೇನುಹುಳ ತಾನು ಸಂಗ್ರಹಿಸಿದ ಜೇನಿನೊಳಗೇ ಬಿದ್ದು ಸಾಯುವಂತೆ ನಾವು, ಮುಕ್ತರಾಗದೆ ಹೋಗುತ್ತೇವೆ. ಲೌಕಿಕವಾಗಿಯೂ ಇದು ನಮಗೆ ಚಿಂತೆ, ದುಃಖಕ್ಕೆ ಕಾರಣವಾಗುತ್ತದೆ. ಇದರಿಂದಾಗಿಯೇ ಚಿನ್ನ ಸಿಕ್ಕಿದವನಿಗೆ ಸದಾ ಚಿಂತೆ ಎಂಬ ಗಾದೆ ಮಾತು ಹುಟ್ಟಿಕೊಂಡಿದೆ. ಕಳ್ಳರ ಭಯ ಒಂದೆಡೆ, ಸಂಪತ್ತನ್ನು ಹೇಗೆ ಬಳಸಬೇಕೆಂಬುದೂ ತಿಳಿಯದೆ ಜೀವನವು ಹಾಳಾಗುವ ಪರಿಸ್ಥಿತಿ, ಸಂಪತ್ತಿದ್ದರೂ ನೆಮ್ಮದಿ ಇಲ್ಲದ ಸ್ಥಿತಿ ಎಲ್ಲವಕ್ಕೂ ಇದು ಕಾರಣವಾಗುವುದರಿಂದ ಜೇನುಹುಳದಿಂದ ಪಾಠ ಕಲಿತುಕೊಂಡು ಅಗತ್ಯವಾದಷ್ಟನ್ನೇ ಸಂಗ್ರಹಿಸಕೊಂಡು ಬಳಸುವುದು ಉತ್ತಮ.

..ಮುಂದುವರಿಯುವುದು.
||ಸರಳವಾಗಿ ಯೋಚಿಸಿ-ಸಂಸ್ಕಾರಯುತರಾಗಿ-ಸರಳರಾಗಿ ಜೀವಿಸಿ||

– ಭಾಸ್ವ.

LEAVE A REPLY

Please enter your comment!
Please enter your name here